میری سسرال میں گھیکوار جسے کوار گندل بھی کہتے ہیں کہ پودے لگے ہوئے ہیں۔ سنا ہے یہ بہت سارے امراض میں کام آتے ہیں۔ آپ اس بارے میں بتائیے۔ گھریلو طور پر ہم کیسے اسے استعمال کرسکتے ہیں؟ (رعنا اشرف،قصور)
مشورہ:گھیکوار کے پودے گھر میں ضرور ہونے چاہئیں۔ یہ پودا کسی بھی زمین میں لگ جاتا ہے۔ باورچی خانہ میں اکثر ہاتھ جل جاتا ہے۔ ایسے میں آپ گھیکوار کی شاخ توڑ کر بیچ میں سے کاٹ کر اس کا گودا لگائیے۔ جلی ہوئی جگہ کو نرم گودے سے تر رکھئے۔ تھوڑی دیر میں جلن، درد سب ختم ہو جائے گا۔ اسی طرح سر کے بالوں کے لیے اس کا رس اچھا ہے۔ اس کی شاخ کاٹ کر ٹکڑے کرکے سر پر اچھی طرح ملئے۔ ایک گھنٹہ بعد سردھولیجئے۔ سر کی خشکی، زخموں اور دانوں کے لیے مفید گھریلو علاج ہے۔ چہرے کے کیل مہاسوں کے داغ نہ جاتے ہوں تو گھیکوار کا گودا صبح شام لگانے سے تین چار ماہ میں داغ ختم ہو جاتے ہیں۔ گرمی کے موسم میں اگر آپ گھیکوار کا رس چہرے پر لگا کر باہر نکلیں تو دھوپ کے اثرات جلد پر نہیں پڑیں گے۔