محترم حضرت حکیم صاحب السلام علیکم! میں آپ کے بارے میں پہلے نہیںجانتی تھی‘ لاک ڈاؤن کی وجہ سے چونکہ سکول بند تھے‘ ان دنوں گھر پر تھی‘ ایک دن یوٹیوب پر آپ کا ایک درس نظر سے گزرا‘ فارغ دی لگا کر سننا شروع کردیا‘ وہ سنا اور پھر اسی طرح آپ کے بے شمار درس سنے اور جتنا ہوسکا اعمال میں لگی‘ یقین کیجئے اللہ کریم پر ایمان بڑھ گیا ہے‘ سوچتی ہوں کاش آپ کا پہلے پتہ چلتا تو آج میرے شوہر زندہ ہوتے‘ شوہر کی وفات کے بعد تو سب نے ملنا ہی چھوڑ دیا ہے۔ آپ کے درس سننے کے بعد میں نے جو وظائف کرنا شروع کیے وہ یہ ہیں:۔1۔ نماز میں سورۂ الم نشرح اور سورۂ فیل۔ 2۔ رکوع اور سجدہ کے درمیان دعائیں مانگتی ہوں۔ 3۔بیعت کارڈ والی تین تسبیحات (درود شریف‘ تیسرا کلمہ اور استغفار)۔ 4۔ نماز میں ربنا ھب لنا من ازواجنا والی دعا۔5۔ نماز کے بعد محمدرسول اللہ احمد رسول اللہ 35 بار۔ 6۔ جنات کو اعمال روزانہ ہدیہ کرتی ہوں۔ 7۔گھر کی چھت پر پرندوں کیلئے دانہ اور پانی ڈالتی ہوں۔ 8۔ہر موقع پر مسنون دعاؤں کا اہتمام کرتی ہوں۔
گھر بنانے کیلئے قرض لیا‘ آسان سے
عمل سے دو سال میں قرض اتر گیا
اسی دوران نماز کی پابندی قائم ہوگئی‘عبقری سے جڑنے سے پہلے کا واقعہ ہے کہ میرے شوہر نے اپنا گھر بنانے کا فیصلہ کیا اسی دوران سارے بھائیوں نے جائیداد کا بٹوارہ کرنے کو کہا ہم نے اپنے حصہ کے ساتھ مزید ساڑھے چھ لاکھ ملا کر اپنی ساس کا گھر خرید لیا۔ ہمارے حالات دن بدن بہتر ہونا شروع ہوگئے‘ ایک دن میں نے ایک جاننے والی کو اپنے حالات بتائے‘ اس نے مجھے یااللہ یارحمن یارحیم کثرت سے پڑھنے کا بتایا‘ میں نے وہ پڑھنا شروع کیا اور پھر جلد ہی ہمارے حالات اچھے اور مزید اچھے ہونا شروع ہوگئے‘ ہمارا قرض اتر گیا‘ اس دوران میں نے بھی کام کرنا شروع کردیا‘ پرائیویٹ سکول میں سائنس ٹیچنگ شروع کردی‘ اس کے ساتھ گھر پر سلائی کاکام بھی کرتی اور ٹیوشن بھی پڑھاتی‘ یوں اپنی آمدنی سے گھر کا خرچ چلاتی اور میرے شوہر جو کماتے جمع کرکے قرض اتارتے‘ دو ہی سال میں ہمارا سارا قرض اتر گیا جو کہ سات لاکھ کا تھا۔(ع،راولپنڈی)