٭ دوسروں کی مالی‘ ذہنی اور اخلاقی حالت سے اپنا موازنہ کرنا ترک کردیجئے اور دوسروں کو تحسین اور وسعت کی نگاہ سے دیکھنے کی عادت ڈالیے۔ یعنی حقیقت پسندی کے ساتھ ان کی شخصیت کو قبول کیجئے۔
٭ خود پسندی کی عادت ترک کردیجئے۔ کمتری کا احساس ختم ہوجائے گا اور اپنے متعلق بھی حقیقت پسندی سے سوچنے کی عادت ڈالیے یعنی خوبیوں کے ساتھ ساتھ اپنی کوتاہیوں پر نگاہ رکھئے اور ان پر فخر نہ کیجئے۔
٭ موازنے کا خوف دل سے نکال دیجئے۔ کوئی آپ کو کمتر نہیں سمجھتا اور ہمیشہ امید افزا رویہ اختیار کیجئے بدترین حالات میں بھی امید کا دامن نہ چھوڑئیے۔
٭افسردگی اور محرومی کا احساس قریب نہ آنے دیجئے اور ہمیشہ کامیابی کے امکانات پر نظر رکھئے ماضی کو تبدیل کرنا ممکن نہیں لیکن مستقبل کو بہتر بنایا جاسکتا ہے۔
٭مصائب‘ دشواریوں اور ناکامیوں کے خوف سے فرار کی راہ اختیار نہ کیجئے کیونکہ کسی کو ان سے فرار ممکن نہیں آپ جہاں جائیں گے یہ آپ کا تعاقب کریں گے اور تلخ صورتحال کو ہمیشہ حوصلے کے ساتھ قبول کیجئے خوف کے ساتھ کبھی نہیں۔
٭ یہ خیال دل سے نکال دیجئے کہ آپ کا حال سب سے بدتر ہے پریشانیاں اور دکھوں میںبھی آپ بہت سے دوسرے لوگوں سے آگے ہوں گے اور کہیں نہ کہیں برتری کے امکانات ضرور ہیں۔ جائیے آگے بڑھئے اور انہیں تلاش کیجئے۔
زندگی کا لطف صرف زندہ رہنے میں ہے۔ اپنے آپ میں رہئے اپنے مقصد کیلئے سرگرم عمل رہئے۔ اس بات کی فکر نہ کیجئے کہ دوسرے آپ کو کیا سمجھتے ہیں۔ آپ کے بارے میں کیا رائے رکھتے ہیں آپ کو برتر سمجھتے ہیں یا کمتر۔ توجہ صرف اس کام پر کیجئے جسے آپ نے مقصد حیات میں کامیابی کا ثمر ہوتی ہے۔ ’’ہرفتح مندی‘ ہر کامرانی ہر کامیابی سے پہلے ایک جنگ لازم ہوتی ہے لیکن بہت سے لوگ جنگ سے پہلے ہی فتح کی تمنا کرتے ہیں۔‘‘
کامیابی کی سچی مسرتوں سے صرف وہی ہمکنار ہوتے ہیں جنہوں نے ناکامیوں سے گزر کر اور ان پر عبور حاصل کرکے کامیابی حاصل کی ہو۔