مچھلی کھانے والی مائوں کے بچے زیادہ باصلاحیت ہوتے ہیں برطانیہ میں کی گئی ایک تحقیق میں بتایا گیا ہے کہ جو خواتین حمل کے دوران مچھلی اور دیگربحری غذائی اشیاء استعمال کرتی ہیں ان کے ہونے والے بچوں پر اس کے طویل مدتی مفید اثرات دیکھے گئے ہیں۔ طبی جریدہ ’’لانسٹ‘‘ میں شائع ہونے والی ایک رپورٹ کے مطابق جن مائوں نے دوران حمل ڈھیر ساری مچھلیاں کھائی تھیں، ان کے بچوں نے سات سال کی عمر میں بات چیت اور سماجی تعلقات کی بہتر صلاحیتیں اپنالی تھیں۔ حالیہ تحقیق کے نتیجے سے ان خدشات کی نفی ہوگئی ہے کہ حمل کے دوران مچھلی کھانے سے جنین کے جسم میں زہریلے اثرات سرایت کرسکتے ہیں۔ برطانوی فوڈ اسٹینڈرڈ ایجنسی نے ہونے والی مائوںکو مشورہ دیا ہےکہ وہ ہفتے میں تین بار مچھلی کے ایک یا دو پورشنز کھایا کریں۔ اس تحقیق میںیہ بھی دیکھا گیا کہ جن بچوں کی مائوں نے حمل کے دوران مچھلی اور سی فوڈ کا استعمال کیا تھا، ان کے بچوں کے رویے، جسمانی صلاحیت، ذہنی لیاقت اور سماجی تعلقات میں بھی اضافہ محسوس کیا گیا۔ اومیگا تھری فیٹی ایسڈرز جن تیل والی مچھلیوں میںزیادہ پائے جاتے ہیں اور جن کے کھانے کی سفارش کی جاتی ہے ان میںسالمن، میکرل، پل چارٹس اور سارڈن مچھلیاں شامل ہیں۔
مچھلی سے صرف پیٹ کم نہیں ! دماغ بھی بہتر ہوگا
پروٹین کے بہترین ذرائع میں سے ایک مچھلی ہے۔ یہ اومیگا3 چکنے ترشے (فیٹی ایسڈز) جیسے بنیادی غذائی اجزا سے بھرپور ہے۔ جسم کو دبلا پتلا رکھنے اور پٹھوں کو مضبوط بنانے کے لیے مچھلی کی پروٹین بہترین ہے۔ مچھلی سے صرف پیٹ ہی کم نہیں ہوتا بلکہ جسم کے افعال بھی بہتر ہوتے ہیں۔ یہ جگر، دماغ اور نیند کے لیے مفید ہے۔ اس لیے اپنی خوراک میں مچھلی کو ضرور شامل کریں تاکہ مندرجہ ذیل فوائد حاصل کر سکیں۔ امراضِ قلب میں کمی: مچھلی کھانے سے دل کی مہلک بیماریوں اور شریانوں کے بند ہونے کا امکان گھٹ جاتا ہے۔ مچھلی میں دل کے لیے مفید اومیگا3 چکنے ترشے ہوتے ہیں جو سوزش کو کم کرنے، دل کی حفاظت کرنے اور دیرینہ امراض سے بچانے میں مددگار ہیں۔ الزائمر سے بچاؤ: مچھلی دماغ کے لیے بھی ضروری غذا ہے۔ سمندری غذا دماغی صحت کے لیے حیران کن فوائد کی حامل ہے۔ یاسیت کی علامات میں کمی: افسردگی دور کرنے والی دواؤںکے ساتھ مچھلی کے تیل کا استعمال یاسیت کی علامات میں زیادہ کمی لاتا ہے۔ نظر میں بہتری: اومیگا 3 چکنے ترشے نظر اور آنکھوں کی صحت کے لیے مفید ہیں۔ اس کا سبب دماغ اور آنکھوں میں ان ترشوں کا زیادہ ارتکاز ہے۔
اچھی نیند کا ٹوٹکہ
اگر آپ کو تاخیر سے نیند آنے یا بری نیند کا مسئلہ درپیش ہے تو مچھلی کا استعمال ایک اچھا ٹوٹکہ ہو گا۔کیل مہاسے: مچھلی جِلد کو بہتر بناتی ہے اور مہاسوں میں مفید ہے۔ مہاسوں سے جِلد کو پاک کرنے میں مچھلی کا تیل فائدہ مند ہے۔ جوڑوں کے لیے مفید: اگر آپ کو جوڑوں کی دیرینہ سوزش کا مرض گنٹھیا نما وجع الفاصل ہے تو سوجن اور درد میں کمی کے لیے زیادہ مچھلی کھانا مفید ہو گا۔ مچھلی کھانے سے اس مرض کا اثر کم ہوتا ہے۔ فالج سے دوری: مچھلی سے پہنچنے والا ایک اور فائدہ دماغ کو ہے کیونکہ اس سے فالج کا خطرہ کم ہوتا ہے۔ مدافعتی نظام میں بہتری: مچھلی میں وٹامن ڈی کی مقدار جسم کی قوت مدافعت اور شکر کے میٹابولزم کو بڑھاتی ہے۔